ایران امریکا جنگ بندی، پاکستان نے دنیا کو 3 کھرب ڈالر سے زائد کا فائدہ پہنچا دیا
شیئر کریں
ٹرمپ الٹی میٹم کے آخری لمحات میں شہباز کی تیز رفتار سفارتکاری نے صورتحال کو یکسر تبدیل کردیا
پاکستان نے دنیا کیلئے اپنی مجموعی قومی پیداوار سے10 گنا زیادہ معاشی قدر پیدا کرنے میں مدد دی
ایران اور امریکا کے درمیان کشیدگی کے دوران پاکستان کی سفارتی کوششوں کو عالمی سطح پر نمایاں کامیابی قرار دیا جا رہا ہے، جس کے نتیجے میں نہ صرف ممکنہ جنگ ٹلی بلکہ عالمی مالیاتی منڈیوں کو بھی بڑا معاشی فائدہ پہنچا۔ 7 اپریل کو دنیا اس لمحے کے قریب پہنچ گئی تھی جب ڈونلڈ ٹرمپ کے رات 8 بجے کے الٹی میٹم کے مطابق آج رات پوری تہذیب تباہ ہو سکتی ہے۔ دوپہر تک پولی مارکیٹ کے اندازوں کے مطابق جنگ بندی کے امکانات 5 فیصد سے بھی کم رہ گئے تھے۔ لیکن پھر آخری لمحات کی تیز رفتار سفارت کاری، جس کی قیادت پاکستان کے وزیراعظم شہباز شریف نے کی، نے صورتحال بدل دی۔ جنگ بندی کے امکانات تقریباً ناممکن سطح سے بڑھ کر 100 فیصد تک پہنچ گئے، جبکہ امریکا اور ایران دونوں کی قیادت نے پاکستان کے اہم کردار کا کھلے عام اعتراف کیا۔جنگ بندی کے امکانات میں اچانک اس تبدیلی نے پاکستان کی کامیاب سفارت کاری کی معاشی قدر کا اندازہ لگانا ممکن بنا دیا۔ جنگ بندی کے اعلان کے بعد ایس اینڈ پی 500 انڈیکس میں تقریباً 2۔9 فیصد کا نمایاں اضافہ دیکھا گیا، اور دنیا بھر کی مارکیٹوں میں بھی اسی نوعیت کا ردعمل سامنے آیا۔ عالمی مالیاتی منڈیوں کی مجموعی مالیت تقریباً 125 کھرب ڈالر ہے، اس لحاظ سے 2۔9 فیصد اضافہ دنیا کیلئے تقریباً 3۔6 کھرب ڈالر کے فائدے کے برابر بنتا ہے۔یوں پاکستان نے دنیا کیلئے اپنی مجموعی قومی پیداوار سے دس گنا زیادہ معاشی قدر پیدا کرنے میں مدد دی۔ امید ہے پاکستان اس نئی شناخت کو آگے بڑھائے گا، نہ صرف بیرون ملک امن کے فروغ کیلئے بلکہ اپنے اندر بھی۔ اس کا مطلب تقسیم اور نفرت کی سیاست سے دور ہونا اور ہر شہری کو برابر کا حصہ دار سمجھنا ہے۔
