مہنگا پیکیج یا قبل از وقت اعلان، حج درخواستوں کی وصولی میں 70فیصد کمی
شیئر کریں
مہنگا حج پیکیج یا قبل از وقت اعلان ، وزارت مذہبی امور کو 14 روز میں صرف 28 ہزار درخواستیں جبکہ اسپانسر شپ اسکیم کے تحت صرف 1600 درخواستیں موصول ہوئی ہیں، کوٹے سے نہایت کم درخواستیں جمع ہونے پر مدت میں اضافے پر غور کیا جا رہا ہے۔ تفصیلات کے مطابق حالیہ شدید مہنگائی مذہبی فریضے حج پر بھی اثر انداز ہوئی ہے اورسرکاری اسکیم کے تحت حج درخواستوں کی توقع سے کم وصولی ہوئی ہے۔ وزارت مذہبی امور کے ذرائع کے مطابق اب تک کوٹے کی تقریباً ایک تہائی درخواستیں جمع ہو سکی ہیں جبکہ حج درخواستوں کی وصولی میں صرف ایک دن باقی رہ گیا ہے، اب تک 14 روز میں 28 ہزار درخواستیں جمع ہوسکی ہیں جس کے بعد وزارت کے حکام نے درخواست وصولی کی مدت میں توسیع پر غور شروع کر دیا۔ ذرائع کے مطابق وزارت حج درخواستوں کی وصولی کی مدت ایک ہفتے سے دس روز تک بڑھائی جا سکتی ہے، حج اخراجات میں ایک لاکھ روپے کی کمی ہونے کے باوجود فی کس قربانی کے اخراجات سمیت تقریبا 11 لاکھ روپے ادا کرنا ہوں گے ، اس وقت سرکاری اسکیم کے تحت مجموعی کوٹہ 89 ہزار 605 ہے ، کم دورانیہ کا حج متعارف کرانے کے باوجود بیرون ملک پاکستانیوں نے عدم دلچسپی ظاہر کی ہے۔ وزارت نے سرکاری ریگولر حج اسکیم کے تحت تقریباً 65 ہزار اور اسپانسر شپ اسکیم کے تحت 25 ہزار کوٹہ مختص کیا ہے، گزشتہ سال وزارتِ مذہبی امور کو 20 ہزار حج کوٹہ سعودی عرب کو واپس کرنا پڑا تھا، اس وقت تک حج کیلئے گزشتہ برس سے بھی کم درخواستیں جمع ہوئی ہیں۔وزارت مذہبی امور کے ترجمان نے بتایا کہ سعودی حکومت کی جانب سے حج انتظامات پہلے شروع کر دیے گئے تھے جس کی وجہ سے وزارت مذہبی امور کو بھی معمول سے پہلے حج اپریشن شروع کرنا پڑا، حج پر جانے کے خواہشمند افراد کی ابھی تیاری نہیں تھی۔ واضح رہے کہ وزارت نے حج درخواستوں کی وصولی کا اعلان 27 نومبر سے 12 دسمبر تک کر رکھا ہے جو منگل تک جاری رہے گا جس میں توسیع کے بارے میں اگلے روز فیصلہ کیا جائے گا۔
