فیس بک کا متعدد ممالک میں نیوز ٹیب ختم کرنے کا اعلان
شیئر کریں
فیس بک نے برطانیہ سمیت یورپ کے متعدد ممالک میں نیوز ٹیب سیکشن بند کرنے کا اعلان کردیا۔فیس بک پر 2018 کے بعد نیوز ٹیب کا سیکشن یورپی ممالک سمیت دیگر ترقی یافتہ ممالک میں متعارف کرایا گیا تھا۔مذکورہ سیکشن پر بڑے نشریاتی اداروں کو خبروں کے لنکس شیئر کرنے اختیار ہے اور مذکورہ لنکس کے لیے فیس بک کمپنیوں کو معاوضہ فراہم کرتا ہے۔یورپی ممالک کے علاوہ نیوز ٹیب کا سیکشن کینیڈا، آسٹریلیا، امریکا اور نیوزی لینڈ سمیت دیگر ممالک میں بھی موجود ہے لیکن اب فیس بک نے اسے یورپ کے چند ممالک میں بند کرنے کا اعلان کردیا۔ٹیکنالوجی ویب سائٹ ’انگیجٹ‘ کے مطابق فیس بک نے برطانیہ، جرمنی اور فرانس میں نیوز ٹیب سیکشن کو بند کرنے کا اعلان کردیا۔مذکورہ ممالک میں بھی اب پاکستان کی طرح نیوز ٹیب سیکشن صارفین کو نظر نہیں آئے گا اور نہ ہی وہاں کے نشریاتی ادارے مذکورہ فیچر سے پیسے کما سکیں گے۔البتہ وہاں پر نشریاتی اداروں کو اپنے پیجز پر خبروں کے لنکس معمول کی طرح شیئر کرنے کا اختیار ہوگا۔نیوز ٹیب کا سیکشن پاکستان اور بھارت سمیت درجنوں ممالک میں متعارف نہیں کرایا گیا اور نہ ہی اسے یہاں متعارف کرانے کا اعلان کیا گیا ہے۔ تاہم پاکستان سمیت دیگر ممالک میں نشریاتی ادارے اپنے پیجز کے ذریعے خبروں کی تشہیر کر سکتے ہیں اور انہیں اپنے پیجز پر فالووز اور ویڈیوز دیکھے جانے کی مد میں معاوضہ بھی فراہم کیا جاتا ہے۔
