بلدیاتی الیکشن میں عام آدمی پارٹی نے دہلی سے بی جے پی کا صفایا کر دیا
شیئر کریں
بھارت کے دارالحکومت نئی دہلی میں بلدیاتی انتخابات کے دوران عام آدمی پارٹی نے وزیراعظم نریندر مودی کی ہندو قومپرست جماعت بھارتیا جنتا پارٹی (بی جے پی)کو واضح شکست سے دوچار کردیا ہے۔بھارتی میڈیا کی رپورٹ کے مطابق دارالحکومت نئی دہلی میں 2022کے بلدیاتی انتخابات کے دوران بھارتی حکمران جماعت بی جے پی کو عام آدمی پارٹی کے ہاتھوں شکست کا سامنا کرنا پڑا ہے جہاں بھارت کی حکمران جماعت کی 15سالہ انتخابی بالادستی ختم ہوگئی ہے۔نتائج کے مطابق عام آدمی پارٹی نے 134وارڈز، بی جے پی نے 104اور کانگریس نے 9وارڈز پر کامیابی حاصل کی ہے جبکہ تین وارڈز پر آزاد امیدواروں نے کامیابی حاصل کی ہے۔بلدیاتی انتخابات کے دوران نئی دہلی کے وزیراعلی ارویند کجروال کی جماعت عام آدمی پارٹی کو بھارتیا جنتا پارٹی پر واضح برتری حاصل ہے۔نئی دہلی کے وزیر اعلی ارویند کجروال نے بلدیاتی انتخابات میں کامیابی کی تصدیق کے بعد ووٹ دینے والوں کا شکریہ ادا کرتے ہوئے شہر کی بہتری کیلئے ملکر کام کرنے پر زور دیا۔ارویند کجروال نے ٹوئٹر پر کہا کہ اس بڑی فتح پر دہلی کے لوگوں کا شکریہ اور سب کو مبارک، اب ہم سب کو مل کر دہلی کو خوبصورت اور صاف رکھنا ہے۔نئی دہلی کے نائب وزیراعلی منیش سسوڑیا نے ٹوئٹر پر کہا کہ دنیا کی سب سے بڑی اور منفی جماعت کو شکست دے کر دہلی کے لوگوں نے ایک ایماندار اور محنتی اروند کیجریوال کو جتوایا ہے۔انہوں نے کہا کہ ہمارے لیے یہ محض کامیابی نہیں بلکہ ایک بہت بڑی ذمہ داری ہے۔
