حمزہ شہباز کا ریلیف پیکیج محدود اختیار سے تجاوز ہے،فواد چوہدری
شیئر کریں
تحریک انصاف کے رہنما فواد چوہدری نے کہا ہے کہ حمزہ شہباز کا ریلیف پیکیج محدود اختیار سے تجاوز ہے، حمزہ شہباز نے عدالتِ عظمی کے واضح احکامات اور انتخابی ضابط اخلاق کو پیروں تلے روند دیا ہے،ضمنی انتخابات کی شفافیت پر اثرانداز ہونے کی کوشش ہے، پیکج کا مقصد عدالت سے حاصل ریلیف کو اپنے سیاسی فائدے کے لیے استعمال کرنا اور عام ووٹر کا ووٹ متاثر کرنا ہے، پاکستان کی تباہ معاشی صورت حال میں ایسے پیکجز کی کوئی گنجائش نہیں، معزز عدالت اس سے متعلق کیا رائے رکھتی ہے۔ ان خدشات کا اظہار انھوں نے سپریم کورٹ کے نام خط میں کیا۔تحریک انصاف کے سینئر نائب صدر فواد چودھری نے منگل کے روز سپریم کورٹ کو خط لکھا ہے، جس میں انہوں نے وزیراعلی پنجاب حمزہ شہباز کے ریلیف پیکیج کے اعلان کو محدود اختیارات سے تجاوز قرار دیا ہے۔ خط میںکہا گیا ہے کہ یکم جولائی 2022 کو عدالت عظمیٰ نے پنجاب کو دستوری پیچیدگیوں اور بحران سے بچانے کے لیے ایک فارمولا وضع کیا، جس کی بنیاد اس میثاق پر قائم کی گئی کہ پنجاب میں ضمنی انتخاب کے صاف، شفاف اور آزادانہ انعقاد پر کسی قسم کا حملہ نہیں کیا جائے گا۔ عارضی وزیراعلیٰ حمزہ شہباز، 22 جولائی تک محض ضابطے کے اختیارات ہی بروئے کار لائیں گے جب کہ عدالت کے سامنے حمزہ شہباز نے خود بھی یقین دہانی کروائی ہے کہ وہ انتخابات میں دھاندلی کا ارادہ نہیں رکھتے۔ وزیراعلیٰ پنجاب حمزہ شہباز شریف کے انفرادی و سرکاری کردار پر پاکستان تحریک انصاف سنگین نوعیت کے تحفظات بھی رکھتی ہے۔ خط میں الزام عائد کیا گیا ہے کہ حمزہ شہباز نے عدالتِ عظمی کے واضح احکامات اور انتخابی ضابط اخلاق کو پیروں تلے روند دیا ہے۔ ضمنی انتخابات سے چند روز قبل صوبے کے عوام کے لیے پریس کانفرنس کے دوران پیکج کا اعلان کیا جسے قومی ذرائع ابلاغ بشمول سرکاری ٹی وی نے براہِ راست نشر کیا، اس پیکیج کی تفصیلات قومی روزناموں نے بھی شائع کی ہیں۔ یہ ایک جعلی پیکیج ہے، جس پر عملدرآمد ناممکن ہو گا، تاہم اس کا مقصد عدالت سے حاصل ریلیف کو اپنے سیاسی فائدے کے لیے استعمال کرنا اور عام ووٹر کا ووٹ متاثر کرنا ہے۔ فواد چوہدری نے خط میں مزید کہا کہ سپریم کورٹ اور احتساب عدالت سے سزایافتہ مریم نواز صوبے بھر میں ضمنی انتخابات کے لیے بھرپور مہم چلا رہی ہیں۔ مریم نواز نے وزیراعلی کے اعلان سے قبل ایک انتخابی جلسے میں پیکیج کا اعلان کیا، جس کے بعد وزیراعلی کے اس اعلان کردہ پیکیج کی پرنٹ، الیکٹرانک اور سماجی میڈیا پر غیر معمولی تشہیر و توصیف کے سلسلے میں شدت لائی گئی۔ سابق وفاقی وزیر نے سپریم کورٹ کو لکھے گئے خط میں لکھا کہ وزیراعلی حمزہ شہباز کے براہ راست احکامات پر تحریک انصاف کے کارکنان کے خلاف پولیس کریک ڈان جاری ہے۔ جعلی کریمنل کیسز میں تحریک انصاف کے کارکنان کو ملوث کیا جا رہا ہے۔ ایک مقدمے سے ضمانت ہوتی ہے تو دوسرے مقدمے میں ملوث کر دیا جاتا ہے۔
