کے الیکٹر ک کی سینہ زوری،400 احتجاجی مظاہرین کے خلاف مقدمہ درج
شیئر کریں
شریف آباد پولیس نے لیاقت آباد ایف سی ایریا میں واقع کے الیکٹرک کے دفترکے باہر شہریوں کی جانب سے احتجاج کے دوران ہنگامہ آرائی اور توڑ پھوڑ کرنے کے واقعے کا مقدمہ تین سو سے چارسو نامعلوم صورت شناس افراد کے خلاف درج کرلیا۔تفصیلات کے مطابق مقدمہ الزام 24/224 کے الیکٹرک ملازم محمد حسین کی مدعیت میں بلوہ، توڑ پھوڑ اور انتشار پھیلانے کی دفعات کے تحت درج کیا گیا۔مدعی مقدمہ کے مطابق مشتعل مظاہرین نے دفتر کے عقبی دروازے سے زبردستی اندر داخل ہونے کی کوشش کی، اس دوران دروازہ بھی ٹوٹ گیا، مشتعل مظاہرین نے احتجاج کے دوران توڑ پھوڑ اور پتھراؤ کیا، پتھرا کے دوران دفتر کی پارکنگ میں موجود چار گاڑیوں کو نقصان پہنچا۔مدعی کے مطابق مشتعل مظاہرین باہر لگے سی سی ٹی وی کیمرے بھی توڑ کر لے گئے، پولیس نے سی سی ٹی وی کیمروں کی مدد سے توڑ پھوڑ میں ملوث افراد کی شناخت کا عمل شروع کردیا۔واضح رہے کہ منگل کی دوپہر علاقہ مکینوں کی جانب سے طویل غیر اعلانیہ لوڈ شیڈنگ کے خلاف لیاقت آباد ایف سی ایریا میں واقع کے الیکٹرک کے دفترکے باہر احتجاج کیا گیا تھا۔
