انکار کی جرأت
شیئر کریں
بے نقاب / ایم آر ملک
کیا ہم ایک تاریخی معرکے کی جانب بڑھ رہے ہیں جس کی پیشانی پراسلام آباد ہائیکورٹ کے چھ منصفوں جسٹس محسن کیانی ،جسٹس بابر ستار ،جسٹس طارق محمود جہانگیری ،جسٹس ارباب محمد طاہر ،جسٹس اعجاز اسحاق خان ،جسٹس ثمن کی جرأت اور جانفشانی کی نئی داستان رقم ہو نے والی ہے۔
ایک فیصلہ کن فتح کے حصول کا خواب جس کی تعبیر میں محب ِ وطن باسیوں کی ماں دھرتی کا حقیقی تصور اُبھر رہا ہے۔برسرِ اقتدار ٹولہ ابھی تک وسوسوں اور ابہام کی سولی پر مصلوب اپنی ناکام خواہشات کی تکمیل میں سرگرداں ہے۔انکار کی جرأت سے آزادی کے ٹھوس اور واضح تصورکی تصویر ہمارے پردہ ٔبصارت پر اُبھری جس کے کینوس پر جسٹس محسن کیانی ،جسٹس بابر ستار ،جسٹس طارق محمود جہانگیری ،جسٹس ارباب محمد طاہر ،جسٹس اعجاز اسحاق خان ،جسٹس ثمن نے انصاف کے رنگ بکھیرے۔
جمہوری تہمتوں سے داغدار اور لتھڑا ہوا خاندانی بادشاہت کا نظا م جو منافقت کی سہولت کاری کے ستونوں پر لرز رہا ہے جہاںسانحہ ماڈل ٹائون کے کرائے کے قاتلوں کو اپنی جیت اور جعلسازیوں کیلئے پالا جاتا ہے۔لوٹ مار کرنے والی ایک اقلیت نے اکثریت کیلئے وطن عزیز کو ایک ”وسیع الجثہ قید خانہ”میں بدل دیا ہے جس کی زنجیروں میں جکڑے عوامی شعور اور احساس کی رگ و پے میں حقیقی آزادی کی جستجو مچل رہی ہے۔جمہوری ٹولہ کے گماشتوں کی دانستہ ہرزہ سرائی اور گراوٹ ذہنی پسپائی کی بدترین مثال ہے۔انصاف کے ایوانوں سے سہولت کار کی اختراع ایک بار پھر بامعنی لباس زیب تن کرکے سامنے آئی ہے۔
اس کے باوجود ہم ایک تاریخی معرکے کی جانب بڑھ رہے ہیں ایک آغاز کی ابتدا دیکھ رہے ہیں ایک ایسی جرأت آمیز للکار جس نے صحن ِ وطن پر چھائے سکوت کے جامد و ساکت ماحول میں ارتعاش پیدا کیا اور جرأت مندانہ موقف کی چادر تان دی۔ ایسے وقت میں جب باری کے کھیل میں دو بڑی پارٹیاں شتر مرغ کی طرح حقائق سے چشم پوشی کر کے لاشوں کا کھیل کھیلتی رہیں،قانون کی دفعات اور آئینی ضابطے محض زیر دست عوام کو محکوم رکھنے کیلئے بناتی رہی ہیں اور اس کھیل میں دو تہائی آبادی غربت کی لکیر سے نیچے کھسک گئی،ان کے عسکری ونگز کی بدولت نہ سفر محفوظ رہا،نہ گھر کی چار دیواری،نہ ا سکول جاتے بچوں کے پلٹ آنے کی کوئی ضمانت،نہ روزی روٹی کیلئے گھر سے جانے والوں کا تحفظ رہا اور انہی کے زیر سایہ عدالت کی عمارتوں میں بیٹھے شہ نشینوں کے چہروں کی کرختگی سائل کی بے بسی دیکھنے کے بجائے کاغذوں کے پلندوں کے اُلٹ پھیر پر یقین رکھتی ہے،جن کے ایوانوں میں آئین کو توڑنے والی وہ ترامیم آئینی ہوتی ہیں جن کو آئینی تحفظ دیا جاتا ہے۔
سیاست میں فیصلوں کا تعین بر وقت نہ ہو تو آپ کی سیاست کا سورج غروب ہو جاتا ہے یہ کریڈٹ پی ڈی ایم کے ٹولے کو جاتا ہے کہ اُس نے ایک خودساختہ کمیشن کی ٹائمنگ ایسے وقت چنی جب 23کروڑ عوام عدلیہ کے فخر جسٹس محسن کیانی ،جسٹس بابر ستار ،جسٹس طارق محمود جہانگیری ،جسٹس ارباب محمد طاہر ،جسٹس اعجاز اسحاق خان ،جسٹس ثمن کے شانہ بشانہ کھڑی ہے،محلاتی سازشوں میں جسٹس منیر جیسے کرداروں کی سہولت کاری کے باوجود ن لیگ کا مقدر بد ترین شکست ٹھہری، جسٹس محسن کیانی ،جسٹس بابر ستار ،جسٹس طارق محمود جہانگیری ،جسٹس ارباب محمد طاہر ،جسٹس اعجاز اسحاق خان ،جسٹس ثمن کی دور اندیشی نے وقت کی پیشانی پر فتح کے آثار نمایاں کر دیے ہیں ، اندر کے خوف نے ن لیگ سے 23کروڑ عوام کی حمایت چھین لی،بوکھلاہٹ میں انسان غلط اور عوام دشمن فیصلوں کے تسلسل کی شاہراہ پر سرپٹ دوڑتا ہے اور قدم قدم پر ٹھوکریں اس کا مقدر بن جاتی ہیں، عوام کی عزت نفس کا سودا کرنے والوں کے سامنے جسٹس محسن کیانی ،جسٹس بابر ستار ،جسٹس طارق محمود جہانگیری ،جسٹس ارباب محمد طاہر ،جسٹس اعجاز اسحاق خان ،جسٹس ثمن کا کردار ایک ڈھال بن کر کھڑاہوگیا، آج وطن عزیز کی نمائندگی اور دستار کا حقدار اور عوام کی ریڈ لائن عمر ان خان ہے جس نے انصاف کے سر پر رکھی دستار کو سلامت رکھا، 1997میں عدلیہ پر حملہ آور ٹولے نے ایک بار پھر اپنے مذموم ارادوں سے عدلیہ کے وجود میں دراڑ ڈال کر اپنے مفادات کی آبیاری چاہی،وہ سیاست جس نے اپنا ضمیررجیم چینج کے تحت چیتھڑے،چیتھڑے کرکے اقتدار کے کھونٹے پر ٹانگ دیا شاید اس بات سے نابلد ہے کہ وطن عزیز کی فضا پر چھایا سکوت اور جمود جسٹس محسن کیانی ،جسٹس بابر ستار ،جسٹس طارق محمود جہانگیری ،جسٹس ارباب محمد طاہر ،جسٹس اعجاز اسحاق خان ،جسٹس ثمن کیلئے عوامی طاقت اور حمایت کی شکل میں سول آمریت کے حصار کو پھاڑ کر باہر نکلے گا،فروری 2024کے الیکشن نے سیاست کے چہرے سے فریب کا بچا کھچا نقاب بھی اُتار پھینکا،مفادات کی پچ پر کھڑا پی ڈی ایم ٹو کا ٹولہ ایک بار پھر سرمائے کے شیر کی آدم خوری کوجعلسازی کے تحت عوام پر مسلط کرنے کی تگ و دو میں کامیاب ہوچکا کہیں ”ووٹ کو عزت دو”کے نام پر دھوکہ دیاگیا تو کہیں فارم 45 کو فارم 47میں بدل کر وطن عزیز کے باسیوں کی آنکھوں میں دھول جھونکنے کی ناکام کوششیں کی گئی ،مگر اس کے باوجود قوم جسٹس محسن کیانی ،جسٹس بابر ستار ،جسٹس طارق محمود جہانگیری ،جسٹس ارباب محمد طاہر ،جسٹس اعجاز اسحاق خان ،جسٹس ثمن کے جرأت مندانہ موقف میں فیصلہ کن فتح کے حصول کا خواب دیکھ رہی ہے۔
جسٹس محسن کیانی ،جسٹس بابر ستار ،جسٹس طارق محمود جہانگیری ،جسٹس ارباب محمد طاہر ،جسٹس اعجاز اسحاق خان ،جسٹس ثمن کیلئے عوام کا سیلِ رواں گلی گلی اور کوچہ کوچہ نکلنے کیلئے بے تاب ہے،جعلی حکمرانی کا ٹولہ جان لے کہ وقت کی آنکھ عوام کا ایک ایسا طوفان دیکھ رہی ہے جو کسی مقام پر رکتا اور تھمتا دکھائی نہیں دیتا،23کروڑ عوام کو سیاسی میدان سے پرے دھکیلنے کی ناکام خواہش دم توڑتی دکھائی دے رہی ہے۔پہلی بار عوام وطن کا سودا کرنے والے اقتدار کے نہیں سچ کے ساتھ کھڑی ہے،عوام نے اپنا سارا اعتماد جسٹس محسن کیانی ،جسٹس بابر ستار ،جسٹس طارق محمود جہانگیری ،جسٹس ارباب محمد طاہر ،جسٹس اعجاز اسحاق خان ،جسٹس ثمن کی جھولی میں ڈال دیا ہے۔ آج میں دیکھ رہا ہوں کہ عوام مفادات کے رشتوں کو توڑ چکے۔
