نمائش پر ہنگامہ ،300افراد کے خلاف دہشت گردی کا مقدمہ
شیئر کریں
نمائش چورنگی پر دھرنا اور پولیس سے تصادم کرنے والے 300 سے زیادہ افراد کے خلاف مقدمہ درج کرلیا گیا ہے، جس میں دہشت گردی کی دفعات بھی شامل ہیں۔ نمائش چورنگی پر دھرنا مظاہرین کے پولیس کے ساتھ تصادم کامقدمہ سولجربازار تھانے میں درج کرلیا گیا ہے، جس میں 5نامزد اور300نامعلوم افرادکے خلاف ہنگامہ آرائی، اقدام قتل، بلوہ، انسداد دہشت گردی اور پولیس پرحملے کی دفعات شامل کی گئی ہیں۔مقدمے کے متن کے مطابق مشتعل مظاہرین نے پولیس پرلاٹھیوں اورپتھروں سے حملہ کیا۔ مشتعل مظاہرین نے پولیس پر فائرنگ بھی کی۔ شرپسندوں نے سب انسپکٹر راجا خالد سمیت 6 پولیس اہلکاروں کو زخمی کیا۔ تصادم کے دوران پتھراؤ سے پولیس موبائل کونقصان ہوا، اور متعدد موٹر سائیکلیں جلائی گئیں۔دوسری جانب مجلس وحدت المسلمین اور اہل سنت والجماعت کی جانب سے کراچی کے 12 مقامات پر دھرنے بدھ کو بھی بدستور جاری رہے، مجلس وحدت المسلمین کی جانب سے چار اور اہلسنت والجماعت کی جانب سے آٹھ مقامات پر دھرنے دیئے گئے ہیں، نمائش چورنگی، ملیر پندرہ ودیگر علاقوں میں دھرنوں کی رپورٹ وزیر داخلہ ضیا لنجار کو پیش کردی گئی ہے جبکہ گزشتہ روز تصادم کے نتیجے میں زخمی ہونے والے پولیس اہلکاروں کی وزیر داخلہ ضیا لنجار اور آئی جی سندھ نے عیادت کی۔ دھرنے ختم کرانے کیلئے شہر بھر میںکریک ڈائون کے باوجود پولیس دھرنے ختم کرانے میں ناکام رہی۔
