کاروبارکی بندش تاجربپھرگئے ،سندھ حکومت کو72گھنٹے کاالٹی میٹم
شیئر کریں
کورونا لاک ڈائون کی آڑ میں زیادتیوں سے دلبر داشتہ تاجروں نے اپنے مطالبات کے حق میں سندھ حکومت کو آج(منگل) سے 72 گھنٹے تک کا الٹی میٹم دیتے ہوئے احتجاج کا اعلان کیاہے۔یہ اعلان پیر کو کراچی الیکٹرانکس ڈیلرز ایسوسی ایشن کے صدر محمد رضوان کی سربراہی میں منعقدہ شہر بھر کے تاجر نمائندوں پر مشتمل مشاورتی اجلاس میں کیا گیا۔اجلاس میں یہ فیصلہ بھی کیا گیا کہ منگل کی شام سے شروع ہونے والی الٹی میٹم کی مدت ختم ہوتے ہی شہر بھر کے تاجر احتجاج اور شٹر ڈائون ہڑتال پر جانے کے لیے مجبور ہوں گے اور بطور احتجاج سندھ اور وفاق کو ٹیکسوں کی ادائیگیاں بھی روک دی جائیں گی۔کراچی الیکٹرانکس ڈیلرز ایسوسی ایشن کے صدر محمد رضوان نے بتایا کہ مشاورتی اجلاس میں مارکیٹوں کے کھلنے کا دورانیہ 6 بجے سے بڑھا کر 8 بجے شب کرنے اور ہفتے میں صرف ایک دن مارکیٹیں بند رکھنے کا مطالبہ پیش کیا گیا ہے۔انہوں نے بتایا کہ اجلاس میں تاجروں پر عائد کیے جانے والے جرمانوں کی پالیسی ختم کرنے پر زور دیا گیا کیونکہ اس اقدام سے ناصرف خوف وہراس کا ماحول پیدا ہورہا ہے بلکہ تاجروں پر دفعہ 188 کے تحت مقدمات قائم ہونے سے ان کا کرائم ریکارڈ بن رہا ہے۔انہوں نے بتایا کہ اجلاس میں یہ فیصلہ بھی کیا گیا کہ ایس او پیز کی کارروائیوں پر پولیس یا انتظامیہ کی زیادتی پر کمیٹی بنائی جائے جبکہ شادی ہالز ریسٹورنٹس کو ایس اوپیز کے ساتھ کاروبار کرنے اجازت دی جائے۔
