محترمہ کو وردی بڑی جچتی ہے۔۔۔!! (حصہ دوم)
شیئر کریں
بے لگام / ستارچوہدری
شریف خاندان کا ذاتی کوئی ایک پراجیکٹ بتادیں، جو نواز شریف کے نام سے منسوب کیا گیا ہو۔۔۔؟ ایسے شوق صرف عوام کے پیسوں سے ہی پورے کرتے ہیں،بات تو یہاں تک ہے،جاتی امرا میں اپنے پیسوں سے کھاتے پیتے،مہمانوں کی خدمت اور دیگر اخراجات بھی نہیں کرتے،ہرماہ سارا بجٹ کھوکھر برادران فراہم کرتے ہیں۔ ان کے شوق کا تازہ ترین کمال دیکھیں،پڑھیں اور مزہ اٹھائیں۔۔ پنجاب حکومت نے وزیراعلیٰ مریم نوازشریف کی قیادت میں تین ماہ کے لیے ترقیاتی بجٹ اسمبلی میں پیش کیا،جس میں مریم نواز شریف کی خواہش پر مختلف شعبوں میں 35 نئی ا سکیمیں شامل کیں،ان ترقیاتی منصوبوں میں تعلیم، صحت اور کھیل کے 9 منصوبوں کو محترمہ کی خواہش پرنواز شریف کے نام پر رکھا گیا، نواز شریف کے نام پر منصوب ترقیاتی منصوبوں میں نواز شریف میڈیکل کالج گجرات،نواز شریف انسٹیٹیوٹ آف کارڈیالوجی سرگودھا، نوازشریف انسٹیٹیوٹ آف کینسر لاہور،نواز شریف یونیورسٹی آف انجینئرنگ اینڈ ٹیکنالوجی ملتان، نوازشریف انفارمیشن ٹیکنالوجی سٹی لاہور، نواز شریف اسٹوٹرف سٹیڈیم سیالکوٹ، ہاکی سٹیڈیم سیالکوٹ، نواز شریف ٹی ایچ کیو ہسپتال سڑک چوبارہ ضلع لیہ شامل ہیں۔ ان منصوبوں پر سرکاری خزانے سے 55 ارب 35 کروڑ کے فنڈز استعمال ہونگے سب سے زیادہ فنڈز نوازشریف کینسر ہسپتال لاہور پر 30 ارب استعمال ہونگے۔ ان منصوبوں کا نوازشریف کے نام سے منسوب کرنے کا مقصد نوجوان نسل میں ان کی مقبولیت کو یقینی بنانا ہے۔ اس کے علاوہ پنجاب حکومت 30 ارب سے 60 لاکھ گھرانوں کو رمضان نگہبان پیکیج فراہم کر رہی ہے جس پر نوازشریف کی تصویر لگائی گئی ہے۔ ان منصوبوں کی تکمیل اگلے 2 سال میں ہوگی۔
چھوڑو۔۔ جلنے،سڑنے،ہوکے بھرنے،ماتم کرنے والی باتیں۔۔ محترمہ کووردی بڑی جچتی ہے۔۔
مزے کی خبر سنیں،محترمہ کے دوسہیلیوں کے درمیان سرد جنگ شروع ہوچکی ہے،اس جنگ کا پہلا نتیجہ برآمد ہوچکا،ڈی جی پی آر اسکینڈل ۔۔۔ ہوا کچھ اس طرح مریم اورنگزیب نے ڈی جی پی آر کو ہدایات جاری کیں کہ150 ملین روپے ڈیجیٹل میڈیا کے اشتہاریو اے کمپنی کوجاری کیے جائیں، ڈی جی پی آر نے وزیراطلاعات عظمیٰ بخاری کو بتایا کہ ان پیسوں کو کیسے جاری کریں۔۔؟ کیونکہ قانونی تقاضے پورے نہیں ہیں،عظمیٰ بخاری نے کہا آپ میرٹ پر کام کریں، پھر ڈی جی پی آر نے میرٹ پر کام کیا، اورخبربھی لیک ہوگئی،اس کے بعد تو پھر ڈی جی پی آر اور سیکرٹری اطلاعات کا تبادلہ تو بنتا تھا۔۔۔ کیونکہ مریم اورنگزیب توشریف خاندان کے ناک کابال ہیں۔انکے حکم عدولی پر توکچھ بھی ہوسکتا ہے۔۔
چھوڑو۔۔۔۔ جلنے،سڑنے،ہوکے بھرنے،ماتم کرنے والی باتیں۔۔۔ محترمہ کووردی بڑی جچتی ہے۔۔۔
نواز شریف کا تازہ بیانہ جو رانا ثناء اللہ اور جاوید لطیف جیسے لوگوں کے بیانات کے ذریعے آگے بڑھایا گیا تھا وہ اپنی بیٹی کے سسر اسحق ڈار کو ڈپٹی وزیر اعظم بنوانے پر آکر ٹھس کر گیا۔۔۔
روشنی سایۂ ظلمات سے آگے نہ بڑھی
زندگی شمع کی اک رات سے آگے نہ بڑھی
چلو۔۔۔ اسحاق ڈار کو ڈپٹی وزیراعظم بنا کر نوازشریف نے اپنے بھائی شہباز شریف کا قد تو چھوٹا کرلیا۔۔یہ ان لوگوں کو میسج دیا گیا ہے جو شہبازشریف کو حقیقی وزیراعظم سمجھ بیٹھے تھے۔۔محترمہ اپنی بہن کے سسر کی ترقی پر خوش ہیں، بلکہ اس بات پر اور زیادہ خوش ہیں کہ انکے چچا کو ”نکرے” لگایا جارہا ہے، اوراپنے چچا سے پارٹی صدارت بھی چھین کر نوازشریف کو دی جارہی ہے اور انکے پارٹی سیکرٹری کو بھی فارغ کیا جارہا ہے اور اس طرح پارٹی محترمہ کے ہاتھ مکمل آجائے گی۔۔
چھوڑو۔۔۔۔ جلنے،سڑنے،ہوکے بھرنے،ماتم کرنے والی باتیں۔۔۔ محترمہ کووردی بڑی جچتی ہے۔۔
آصف کرمانی بتاتے ہیں محترمہ کا نام مریم صفدر سے مریم نواز کرنے میں ان کا اہم کردار تھا،بتاتے ہیں،نواز شریف نے انہیں کہا کہ مریم کے ساتھ صفدر نہیں آناچاہیے،نواز آنا چاہیے۔۔۔پھر انہوں نے ارتھ ڈے کے موقع پر تمام چینل کو ٹکر بھیج دیئے ”ارتھ ڈے پر جاتی امرا کی لائٹیں بند کی جائیں گی،مریم نواز”۔۔۔ بس اس کے بعد پھر مریم نواز شروع ہوگیا۔۔۔ محترمہ پر لکھی گئی کتاب دختر”پاکستان” میں انکشاف کیا گیا کہ موصوفہ کو بچپن میں ہی وردی پہننے کا بڑا شوق تھا،زمانہ طالبعلمی میں کئی پروگرامز میں انہوں نے فوجی وردی پہنی تھی،یہ بچپن کا ہی شوق تھا جو انہوں نے وزیراعلیٰ بن کر پورا کیا ہے۔۔
چھوڑو۔۔۔ جلنے،سڑنے،ہوکے بھرنے،ماتم کرنے والی باتیں۔۔۔ محترمہ کووردی بڑی جچتی ہے۔۔۔
محترمہ کے وردی پہننے پر انکی پارٹی کے ارکان، انکے فالوورز انتہائی خوش ہیں، شاہ بابا سے خوشی کی وجہ پوچھی تو وہ ہنس پڑے،میں نے دوبارہ اپنا سوال دھرایا تو زیر لب مسکرائے، میں بھی باز نہ آیا،تیسری بار پوچھ لیا، وہ کہنے لگے سن۔۔۔!!گاؤں کے چوہدری کے کتے سے مراثیوں کا کتا جیت گیا۔۔ مراثی صبح شام چوہدری کے گھر کے سامنے بھنگڑے ڈالتے۔۔۔ چوہدری بہت پریشان تھا کہ کہیں سے کوئی تگڑا کتا ملے اور ان کے منہ بند کیے جائیں۔۔۔ آخر کار چوہدری کو کتا ملا اور بہت مہنگا ملا، چوہدری نے سوچا چلو عزت تو واپس ملے گی۔۔میدان سجا ہر عام و خاص کو مدعو کیا گیا اور چوہدری کا کتا جیت گیا۔۔چوہدری خوشی خوشی گھر جا رہا تھا کہ سامنے وہی مراثی بھنگڑے ڈالتے ہوئے آرہے تھے۔۔۔چوہدری کو تجسس ہوا کہ میں نے اپنی جمع پونجی ان کو ہرانے میں لگا دی اور یہ بھنگڑے ڈال رہے ہیں۔۔۔اور جب چوہدری نے ان سے پوچھا کہ میں تو اس لیے خوش ہوں کہ بچی کھچی عزت واپس مل گی، لیکن تم تو ہار گئے تم کیوں بھنگڑے ڈال رہے ہو؟مراثی کہنے لگے۔۔۔ چوہدری صاحب۔۔!! اسی مراثی آں،نچنا ساڈا کم اے،سانو جت ہار نال کی مطلب۔۔۔
ویسے۔۔۔۔۔ محترمہ کووردی بڑی جچتی ہے۔
