ہرمز میں امریکی مداخلت، جنگ بندی کی خلاف ورزی سمجھیں گے، ایران کا انتباہ
شیئر کریں
امریکی اقدامات ناقابل قبول ، سنگین نتائج برآمد ہو سکتے ہیں، ابراہیم عزیزی
غزہ،لبنان میں کشیدگی برقرار، اسرائیلی کارروائیوں میںپانچ طبی اہلکار زخمی
ایران نے آبنائے ہرمز میں امریکی بحری مشن پر سخت ردعمل دیتے ہوئے خبردار کیا ہے کہ کسی بھی قسم کی امریکی مداخلت کو جنگ بندی کی خلاف ورزی تصور کیا جائے گا۔ یہ بیان اس وقت سامنے آیا ہے جب امریکی صدر ڈونلڈ ٹرمپ نے “پروجیکٹ فریڈم” کے نام سے ایک بحری مشن کا اعلان کیا ہے، جس کے تحت ہرمز میں پھنسے جہازوں کو بحفاظت نکالنے کے لیے آئندہ چند گھنٹوں میں کارروائیاں شروع کی جائیں گی۔ ایران کے سینئر قانون ساز ابراہیم عزیزی کا کہنا ہے کہ آبنائے ہرمز میں امریکی اقدامات ناقابل قبول ہوں گے اور اس کے سنگین نتائج برآمد ہو سکتے ہیں۔ دوسری جانب ایرانی وزارت خارجہ نے کہا ہے کہ وہ جنگ کے خاتمے کے لیے پیش کردہ اپنے 14 نکاتی منصوبے پر واشنگٹن کے ردعمل کا جائزہ لے رہی ہے، جبکہ صدر ٹرمپ پہلے ہی اس تجویز کو “ناقابل قبول” قرار دے چکے ہیں۔ ادھر خطے میں کشیدگی بدستور برقرار ہے۔ اسرائیل نے لبنان پر بمباری کا سلسلہ جاری رکھا ہوا ہے جس کے نتیجے میں پانچ طبی اہلکار زخمی ہو گئے، جبکہ غزہ میں اپنی کارروائیوں کو وسعت دیتے ہوئے ایک نئی حد بندی “اورنج لائن” کے نام سے متعارف کرائی ہے۔ تازہ جانی نقصان کی تفصیلات کے لیے متعلقہ ذرائع مسلسل اپ ڈیٹس جاری کر رہے ہیں۔
